Fin de ano perfecto para o Pontevedra Club de Fútbol, que pecha líder o 2024 despois de remontar un 1-0 en casa do Real Ávila.
E iso que non saíu cómodo o cadro granate ao terreo de xogo do Adolfo Suárez e é que os locais, cunha alta presión, procuraban e conseguían complicarlle a saída de balón.
O resultado foi, que despois dun despexe de Edu Sousa, Mario Rivas cazou o esférico e o enchufó no interior da rede para subir o 1-0 pouco antes de que se cumprise o cuarto de hora de xogo.
Necesitaba o Pontevedra unha reacción urgente e non tardou en chegar. Igor enviou o balón en longo ao carril dereito, onde estaba Chiqui, e o estremeño aproveitou o fallo do lateral para plantarse diante do gardameta e devolver as táboas ao marcador.
A pesar do gol, o conxunto granate seguía sendo incapaz de facerse co control ao que está afeito e foi a balón parado a maneira que tivo para crear outra vez perigo en portaría rival. Yelko colgou o balón na área desde a esquina e Charly rematou, pero Álvaro estivo moi atento para deixar sen espazos ao dianteiro e evitar o tanto.
Despois do paso polos vestiarios, o Ávila non tardou nada en volver pór en apertos ao Pontevedra cunha falta moi perigosa ao bordo da área, pero os granates, cunha boa defensa, liquidaron a acción.
Moveu ficha entón Yago Iglesias e deu entrada a Rufo en lugar de Charly, pasando o dianteiro a ser clave na xogada do segundo tanto lerezano, enviando un balón entre liñas ás costas da defensa para que Chiqui, ao primeiro toque, batese a Álvaro. Antes, Dalisson probara fortuna cun disparo de lonxe que se foi pola dereita da portaría local.
Despois do tanto, o Pontevedra por fin empezouse a sentir cómodo sobre o verde e pasou a facerse co control, contemporizando e mantendo a posesión para evitar posibles sustos.
E aguantaron os granates sen apenas problemas até os últimos minutos de encontro, cando o Ávila tivo nun saque de esquina a acción máis perigosa do segundo tempo e coa que puido devolver as táboas, pero Edu, moi atento, atallou o balón. Pero a xogada non acabou aí. Cassio enfrontouse ao gardameta do Pontevedra e deulle un cabezazo. O colexiado viuno e mostroulle vermella directa, deixando ao cadro local cun xogador menos.
O partido xa estaba de face para os de Lérez, que aguantaron até o final para levar o triunfo e durmir a seis puntos do Numancia, que xoga o domingo ás 18:00 en casa do Avilés.
REAL ÁVILA CF (1): Álvaro, Mario Rivas, Toper (Campos, min. 70), Cassio, Alberto Martín (Pedro Luz, min. 60), César Llopis, Alpha, Adri Carrión, Álex Moreno (Adilson, in. 70), Fer Díaz e Vitolo.
PONTEVEDRA CF (2): Edu Sousa, Igor, Álex González, Yelko (Mario Gómez, min. 90), Chiqui, Samu, Dalisson, Pelayo, Charly (Rufo, min. 55) e Héctor (Iago Novo, min. 80).
Árbitro: Pablo Gargantilla Fernández (Estremadura), auxiliado nas bandas por Joan López Camuñez e Luís Cascón Méndez. Amoestaron a Álex Moreno (23') e Alpha (66') no Ávila, e a Pelayo (24') no Pontevedra. Expulsaron con vermella directa ao xogador local Cassio no minuto 86.
Goles: 1-0, Mario Rivas (min. 12). 1-1, Chiqui (min. 18). 1-2, Chiqui (min. 65).
Incidencias: Partido da xornada 17 de liga na Segunda RFEF disputado no Municipal Adolfo Suárez.