Tres puntos cada un. Un só partido gañado nas catro xornadas disputadas. Dous goles marcados polos granates e un tan só polos branquiazuis. Son os números que levaron a Pontevedra e Compostela ás últimas posicións da táboa neste arranque ligueiro, convertendo o derbi entre ambos en Pasarón (domingo, 17:00 horas) nun partido entre necesitados.
Certo que a responsabilidade sobre o papel recae ao lado dos homes de Luisito, por aquilo de exercer de locais, pero sobre todo pensando no complicado calendario que se lle aveciña nas tres xornadas seguintes, nas que ha de visitar a Rácing de Ferrol e Rácing de Santander, recibindo entre ambos os dous ao Coruxo, pero tamén é verdade que os de Iñaki Alonso chegan obrigados a puntuar para acougar os ánimos dos seus seguidores, que xa o pasado domingo deixaron en San Lázaro as primeiras mostras do seu enfado cun equipo confeccionado para loitar polos postos de ascenso.
Os granates realizaron o último adestramento da semana na mañá deste sábado, en Príncipe Felipe. Á conclusión Luisito decidiu convocar aos 19 xogadores que ten dispoñibles, deixando fóra aos lesionados Jacobo, Miguel Loureiro e Queijeiro, polo que deberá realizar tres descartes minutos antes do comezo do partido.
Aínda sendo baixa para este partido, e posiblemente para un par de xornadas máis, a boa noticia chegaba para Jacobo, que coñecía o resultado da resonancia magnética á que foi sometido esta semana. Dita proba determinou que a lesión que padece o de Bueu é menos grave do que se temía nun principio, non existindo rotura nin tendo tampouco afectado o menisco, quedándose nunha torcedura do ligamento lateral interno do xeonllo, ademais dunha contusión ósea.
En canto a Queijeiro, aínda que podería mesmo estar en condicións de xogar fronte ao Compostela, Luisito preferiu darlle descanso e non forzar, para evitar unha posible lesión de máis longa duración.
Tanto Tomás como Pablo Carnero, que arrastraban molestias, adestraron con normalidade, polo que os 19 xogadores convocados polo técnico granate son: Edu, Lloves, Adrián, Pablo, Capi, Campillo, Bruno, Verdú, Anxo, Kevin Presa, Pedro García, Álex Fernández, Mouriño, Tubo, Tomás, Miky, Jandrín, Borjas e Pablo Carnero.
Os granates móstranse confiados nas súas posibilidades, e aínda que son conscientes de que enfronte estará un rival dos máis complicados da categoría, a pesar do que indique a súa clasificación, o seu reto é transformar as ocasións que cren ante a meta contraria para facerse coa vitoria.
O colexiado encargado de dirixir o partido será Alfonso Vicente Moral (Castela-León), auxiliado nas bandas por Javier Gómez Gago e Javier Muriel Isidro.