A Sociedad Deportiva Teucro ten claro como debe resolverse a suspensión, polo momento temporal, da competición debido á alerta sanitaria.
A xunta xestora da entidade pontevedresa acordou este xoves, despois dunha reunión telemática, preparar e presentar un escrito dirixido ao Comité de Competición e á Comisión Delegada da Real Federación Española de Balonmán.
No mesmo solicítanlle que se de por finalizada de maneira definitiva a tempada na División de Honra prata sen que se produzan nin ascensos nin descensos.
Entende a xestora teucrista que a actual situación de parálise "obriga a tomar unha rápida solución ao futuro inmediato das competicións que pasa por suspender a categoría de forma permanente nesta tempada 2019-2020".
Con esta decisión desbloquearíase unha situación que levou a varios equipos, entre eles ao propio Teucro, a presentar un Expediente de Regulación de Emprego Temporal (ERTE) para tentar sobrevivir economicamente á crise derivada pola expansión do coronavirus.