Faltan tan só oito días para que arranque a competición do Mundial xuvenil de 49er, 49er FX e Nacra 17, proba que reunirá durante cinco intensas xornadas de competición a máis dun centenar de tripulacións de 24 nacionalidades e catro continentes.
A Ría de Arousa será o incomparable escenario para esta proba. Moitos dos equipos que pelexarán polo título intercontinental levan xa varias semanas instalados en Vilagarcía, adestrando no campo de regatas e realizando a última posta a punto do material.
O Mundial comezará oficialmente este próximo domingo, día 14 de xullo, coa primeira das e tres xornadas reservadas para rexistro e medicións.
O martes día 16, tras finalizar a regata de adestramento, ás 18:00 horas terá lugar a cerimonia de apertura co desfile dos equipos desde o Centro Galego de Vela ata a Praza de Galicia, onde serán recibidos polas autoridades.
Xa o mércores, a partir das 12:00 horas o comité de regatas dará o primeiro bocinazo de saída para unha frota que estará dividida en catro grupos -dous de 49er, un de 49er FX e outro de Nacra 17- e repartidos en dúas áreas de regata situadas en plena ría de Arousa.
A competición estará acompañada dun completo programa social no village do Centro Galego de Vela con ceas e degustacións de produtos típicos de Galicia para os preto de trescentos participantes nesta cita intercontinental.