O Club Baloncesto Arxil sumou esta fin de semana a súa terceira vitoria consecutiva e cuarta da tempada ante o penúltimo clasificado Aridane nun partido cómodo para as pontevedresas.
O equipo adestrado por Mayte Méndez tivo que desprazarse ao Pavillón da Raña, en Marín, debido á celebración do campionato galego de break dance na pista do Centro Galego de Tecnificación Deportiva. E sentoulle máis que ben esta mudanza, mostrando unha clara superioridade en todas as facetas de xogo que lles permitiu facerse cun novo triunfo.
De feito, a solidez defensiva realizada durante o primeiro cuarto valeulle ao Arxil para asinar un parcial de 17-3, en parte grazas ao xogo de Forster recollendo rebotes e de Nerea Liste na súa efectividade de fronte ao aro (19 puntos)
Nada cambiou antes de alcanzar o descanso, aínda que o Aridane anotou sete puntos, o dominio das xogadoras de Mayte estaba a ser máximo e elas estaban cómodas sobre a cancha, gozando e facendo gozar do seu xogo (38-10).
Tras o paso polos vestiarios a cousa seguiu igual e mesmo chegou o Arxil a colocarse 38 puntos arriba cando se chegou ao ecuador do terceiro cuarto, pasando a defender sen presión e deixando un pouco máis solto ao seu rival (58-30).
Pero o control era esmagador para as de Pontevedra e mantivérono ata o final, certificando un cómodo triunfo por 75-43 nun encontro no que volveron anotar todas as xogadoras que tiveron minutos.
Consulta as estatísticas do partido nesta ligazón