A ninguén se lle escapa xa que, a tres xornadas para o final da primeira fase na Segunda División B, calquera punto pode resultar decisivo, e máis se como o Pontevedra chega ao sprint final coa corda no pescozo e sen marxe de erro se quere, polo menos, aspirar a entrar a próxima campaña na Primeira RFEF.
Con ese panorama, e tras o descanso que supuxo o parón da competición a última fin de semana, os granates regresan este luns 1 de marzo aos adestramentos coa mente posta no transcendental encontro que disputará o domingo 7 (19.00 horas) no Estadio Municipal de Riazor fronte ao Real Club Deportivo.
Os de Luisito saben que todo o que non sexa gañar no feudo coruñés supoñerá dicir adeus practicamente ás súas opcións, quedando abocados á pelexa pola permanencia na Segunda B ou Segunda RFEF, o que na práctica xa supón perder unha categoría.
Tras unha semana de sobresaltos, co susto que supuxeron os problemas de saúde do técnico, o plantel pontevedrés céntrase agora sen maiores distraccións nun duelo que se prevía clave desde o inicio da liga, aínda que ninguén pensaba que nas actuais circunstancias.
Cunha traxectoria paralela durante os últimos encontros, granates e branquiazuis pasaron de pelexar pola primeira posición a facelo por manterse entre os seis primeiros, só separados por dous puntos (20 o Deportivo que é sexto e 18 o Pontevedra, sétimo).
Luisito xa recoñeceu na súa volta ao traballo que "teño idea do que facer na Coruña", e para profundar nela conta por diante con cinco sesións de adestramento.
Segundo o plan de traballo elaborado, o plantel pontevedrés inicia este luns a semana en horario de tarde, e tras gozar de novo día de descanso o martes, traballará en horario matinal míercoles, xoves, venres e sábado, todo iso no campo de fútbol de Xeve. É o tempo que terá o adestrador de Teo para preparar todos os detalles para a batalla de Riazor, elaborando un plan que, espera, supoña traer os 3 puntos de volta á cidade do Lérez e, de paso, gañarlle o average ao seu rival, algo que tamén pode resultar decisivo.