A Xunta de Goberno da Deputación de Pontevedra aprobou este xoves as axudas económicos para deportistas olímpicos da provincia ou afincados na mesma e que participarán nos inminentes xogos de Río 2016.
Desta forma nove deportistas olímpicos e outros seis paralímpicos accederán a unha subvención de 8.000 euros.
Os beneficiados por esta medida son Jean Marie Okutu e o deportista de orixe cubana Frank Casañas en atletismo; Óscar Carrera, Rodrigo Germade e Teresa Portela en piragüismo; Fernando Echávarri e Támara Echegoyen en vela; María Bernabeu en judo; e o talaverano Fernando Alarza en triatlón.
Iso en canto aos que competirán en só uns días en Brasil. Pola súa banda en setembro nos Xogos Paralímpicos tomarán parte, e reciben a mesma axuda: Gustavo Nieves en atletismo, Chano Rodríguez en natación, Juan Saavedra en tiro olímpico, Agustín Alejos en baloncesto, Martín de la Puente en tenis en cadeira e Susana Rodríguez en triatlón.
"Seguro que todos e todas imos vibrar coas actuacións dos nosos deportistas en Río 2016", sinalou a presidenta provincial, Carmela Silva, ao explicar esta liña de axudas, que ascende a 120.000 euros. Ademais declarou sentirse "moi orgullosa" da presenza de tantos deportistas da provincia nos Xogos Olímpicos.