O Comité Técnico de Árbitros (CTA) da Real Federación Española de Fútbol deu a coñecer este luns as designacións arbitrais para os encontros de segunda rolda de Copa do Rei.
No caso do Pontevedra Club de Fútbol, que recibirá en Pasarón o mércores 4 de decembro ao Vilarreal, contará cun colexiado de Primeira División para a cita.
En concreto farao cun árbitro que encadea este curso a súa oitava tempada dirixindo partidos na máxima categoría nacional.
Trátase do asturiano Pablo González Fuertes, de 44 anos de idade, e que estará auxiliado nas bandas por Israel Bárcena Rodríguez e Rubén Becerril Gómez.
Na súa ampla traxectoria profesional González Fuertes suma cinco cursos en Segunda División e oito máis na xa desaparecida Segunda B, na que coincidiu en multitude de ocasións co conxunto granate.
De feito será a novena vez que dirixa un partido oficial no Estadio Municipal de Pasarón, sendo todas as anteriores precisamente nesa época na Segunda División B.
Neses partidos o balance é positivo para o Pontevedra, con seis vitorias granates, un empate e unha derrota, curiosamente na súa última visita na tempada 2010-2011 nun encontro fronte ao Real Madrid Castilla (0-2).
A estas cifras súmase unha derrota a domicilio en Ourense.
O cuarto árbitro do Pontevedra-Villarreal de Copa do Rei será o tamén asturiano Francisco García Riesgo, colexiado de Primeira RFEF.