O Villalonga xa ten novo adestrador, e é un técnico con experiencia contrastada na Terceira RFEF.
Apenas un día despois de anunciar a saída de Luciano González, técnico co que ascendeu a pasada tempada, o club celeste confirmou quen será o seu substituto en principio ata final de curso.
Trátase de Alberto Mariano, preparador que as dúas últimas campañas dirixiu ao Casino Arzúa.
Antes foi o artífice do ascenso do Estradense a Terceira, club no que permaneceu durante cinco campañas.
"O que fóra nomeado por Golsmedia mellor adestrador da Terceira Galega no 2021 ponse aos mandos do equipo de San Pedro para o que resta de tempada. Benvido á túa nova casa e moita sorte, porque a túa sorte será a nosa!", sinalou o Villalonga tras facer oficial a súa incorporación.
O seu obxectivo nesta etapa será loitar pola permanencia na categoría, tras un inicio de curso complicado cun só triunfo en 10 xornadas.
Cómpre lembrar que o Villalonga ocupa actualmente a penúltima posición con 6 puntos, a dous da zona de salvación.
O seu primeiro encontro como adestrador dos celestes será a visita do Arosa ao campo de San Pedro o próximo domingo 17 de novembro (16.30 horas).