Todo apunta a que o Estadio Municipal de Pasarón presentará un gran ambiente para vivir o primeiro partido da eliminatoria polo ascenso entre Pontevedra e Murcia, a pesar de xogarse nun horario pouco habitual para a afección granate, sábado ás 20:00 horas.
Durante a primeira xornada de venda anticipada foron moitos os afeccionados que se achegaron polas oficinas do club e pola Cafetería Carabela para adquirir a súa localidade ou abono.
Aínda que aínda non se esgotaron as entradas bonificadas (cun desconto de 5 euros), na primeira xornada despacháronse gran parte das mesmas e ampliouse o seu número ás 400 por bancada.
Por outra banda no estadio pontevedrés haberá presenza tamén de afeccionados visitantes, unha vez que a Federación de Peñas Murcianistas anunciou unha viaxe organizada con dúas opcións, desprazamento só en autocar (25 euros entrada incluída) e viaxe en autobús facendo noite na cidade de Lérez (68 euros con entrada).
VOLTA AO TRABALLO, A PORTA PECHADA
Despois de descansar durante o martes, o Pontevedra retoma este mércores os adestramentos cunha sesión no Estadio Municipal de Pasarón.
A particularidade dáse en que Luisito decidiu blindar ao equipo e traballará o que resta de semana a porta pechada, empezando este mércores e continuando coas sesións previstas o xoves en Poio e o venres de novo en Pasarón.