Aproveitando o Mundial de Dúatlon que se disputa durante esta fin de semana na localidade asturiana de Avilés, Pontevedra estrena a campaña de promoción do que será o gran evento deportivo do ano 2019, o ITU Multisport Festival.
Na cidade de Lérez celebraranse nesa data os mundiais do dúatlon, acuatlón, tríatlon de longa distancia e tríatlon cros.
Por ese motivo, aproveitando a presenza en Avilés de preto de 2.000 deportistas, danse os primeiros pasos publicitarios. Cada un dos atletas recibirá en Asturias un folleto informativo do ITU Multisport Festival de Pontevedra.
Ademais montouse un espazo informativo no Centro Niemeyer, con imaxes da cidade e das competicións que se celebraron ata a data.
A imaxe promocional do ITU Multisport Festival baséase no logotipo habitual das competicións de tríatlon que se disputan en Pontevedra adaptando á fórmula multideportiva, con alusións cromáticas a cada unha das especialidades.
"Pontevedra, city of triathlon" e "All in Pontevedra" son as mensaxes incluídas nunha campaña que se desenvolve integramente en inglés.