A Liga Feminina 2 de baloncesto comezará na data prevista, o 3 de outubro. Así o ratificou a Federación Española de Baloncesto tras a reunión da comisión de clubs celebrada este xoves.
No encontro o organismo federativo comunicou ademais algunhas das medidas de obrigado cumprimento durante a tempada, empezando pola realización de test de COVID-19 cada semana na que haxa xornada, un par de días antes do encontro para contar co resultado antes do desprazamento dos equipos.
Esta medida pode supoñer un gasto importante para os equipos, á espera de coñecer que probas serán as esixidas e que parte recaerá nos clubs. Neste aspecto segundo Lino Vázquez, representante do Club Baloncesto Arxil presente na citada comisión de clubs, a factura podería ascender ata aproximadamente 55.000 euros no caso de tratarse de probas PCR, algo que sería "inasumible", rebaixarse ata os 16.000 euros para toda a tempada ou mesmo aproximadamente 1.600 no caso dos test de saliva.
Ademais o protocolo federativo establece que se aprazará un encontro cando se rexistren tres positivos nun mesmo equipo.
Mentres o panorama séguese aclarando nos despachos, a nivel deportivo o Arxil prosegue coa súa preparación para o inicio da liga coa Copa Galicia como primeiro exame. O equipo pontevedrés debutará na competición autonómica o vindeiro martes 22 de setembro (20.45 horas) fronte ao Celta no pavillón vigués de Navia.