Os dezaseisavos de final da Copa de Rei xa teñen data. O encontro que enfrontará en Pasarón ao Pontevedra CF co Real Mallorca foi fixado para o venres 3 de xaneiro.
O partido xogarase a partir do sete da tarde, segundo confirmou a Real Federación Española de Fútbol, que anunciou os horarios de todos os encontros desta fase da competición, que volverá ser a partido único.
As entradas para este Pontevedra-Mallorca xa están á venda. Por agora, só para abonados da entidade granate, que terán preferencia na súa compra.
Os prezos para o público adulto, que son os mesmos que na eliminatoria anterior contra o Vilarreal, oscilan entre os 25 euros para Fondo Norte e Fondo Sur, os 35 euros para Preferencia e os 45 euros para Tribuna.
Para os xuvenís, os espectadores de até 16 anos, a entrada custará 20 euros en Fondo Norte, Fondo Sur e Preferencia e 35 euros en Tribuna.
Os abonados, que entrarán gratis mostrando o seu carné, poderán adquirir un máximo de dúas entradas, sempre para a mesma bancada do seu abono.
Estarán dispoñibles para eles de maneira exclusiva até este vindeiro venres 13 de decembro, ás nove da mañá.
Desde ese momento a venda de entradas estará aberta ao público xeral, tanto a través da súa modalidade online como presencial nas oficinas do club.