O escritor e historiador Xosé Filgueira Valverde será o autor homenaxeado con motivo do Día das Letras Galegas 2015. A decisión tomárona os membros da Real Academia Galega da Lingua reunidos este sábado na Coruña. Buscan recoñecer así a súa "extensa obra de carácter divulgativo", que convertiu ao pontevedrés nunha das "figuras centrais da cultura galega do século XX", segundo a institución.
Nado en Pontevedra en 1906 e finado na mesma cidade en 1996, Xosé Fernando Filgueira Valverde foi membro fundador do Seminario de Estudos Galegos, director do Museo de Pontevedra, alcalde de Pontevedra durante o franquismo e, xa na democracia, conselleiro de Cultura.
Escritor prolífico e dotado dunha grande erudición, a súa inxente produción abrangue unha ampla diversidade de temas, tratados sempre con gran rigor intelectual, entre os que salientan as súas achegas á nosa historia e etnografía, así como ao estudo da literatura galega medieval.
Firmemente comprometido na defensa e promoción da nosa cultura, o legado intelectual de Filgueira Valverde constitúe, pola súa amplitude e calidade, un dos máis importantes da segunda metade do século XX.
O presidente da Real Academia Galega, Xesús Alonso Montero, afirmou que con esta elección sáldase unha "débeda histórica". A candidatura de Xosé Filgueira Valverde xa fora presentada varias veces. Desta volta logrou impoñerse ao resto dos autores propostos, entre os que estaban Xela Arias Castaño, Ricardo Carballo Calero, Celestino Fernández de la Vega e Manuel María Fernández Teixeiro.