Xan Tilve Castro, máis coñecido como Xan de Campañó, será o gaiteiro homenaxeado no XIV Memorial Ricardo Portela que se celebrará na cidade de Pontevedra os próximos 12 e 13 de xullo. Faino repetindo o formato da pasada edición, que supuxo comezar unha nova etapa neste evento, ao deixar de lado o tradicional concurso de gaitas para honrar cada ano á figura "fundamental" dun dos nosos músicos máis populares.
Segundo explicou Álvaro Novegil, presidente da Asociación de Gaiteiros das Rías Baixas, Xan de Campañó foi o "precursor" da técnica do toque pechado, que posteriormente empregaron os gaiteiros de Soutelo ou o propio Ricardo Portela. Fíxoo "nun momento moi complicado porque apenas había artesáns e as gaitas mesmo as fabricaban eles", malia o cal "soubo levar a nosa música e a nosa gaita a un lugar moi importante".
Foi, destacou a concelleira de Festas, Carme da Silva, unha figura "moi importante" da música tradicional galega e era un "mestre de mestres" admirado polo propio Ricardo Portela. Desde o Concello de Pontevedra queren ademais que esta homenaxe a Xan de Campañó sirva tamén para darlle á cultura "o lugar que lles corresponde", especialmente nun momento "non que non é doado pelexar polo noso patrimonio cultural".
A programación do XIV Memorial Ricardo Portela, protagonizada por grupos saídos do concurso de anos anteriores como un "recoñecemento a todos eles", é a seguinte:
Venres 12 de xullo
- De 17.00 a 21.30 horas: XI Mostra de Artesáns de Instrumentos Tradicionais, na Praza da Ferrería
- 19.30 horas: Pasarrúas de Os de Algures
- 21.00 horas: Actuación de Os Melidaos, na Praza da Ferrería
Sábado 13 de xullo
- De 11.30 a 14.00 e de 18.00 a 21.30 horas: XI Mostra de Artesáns de Instrumentos Tradicionais, na Praza da Ferrería
- 12.00 horas: Pasarrúas de Os Picurruchos
- 19.30 horas: Pasarrúas de Abelente e Ludovaina
- 21.00 horas: Homenaje a Xan de Campañó, na Praza da Ferrería
- 21.15 horas: Actuación de Zurrumalla, na Praza da Ferraría
No acto central deste XIV Memorial Ricardo Portela, a homenaxe a Xan de Campañó, estarán presentes as familias de ambos gaiteiros e volverase a tocar a gaita de Xan de Campañó. Será grazas ao musicólogo Pablo Carpintero.