A Ponte do Burgo foi escenario este venres da presentación oficial do festival Río Verbena Fest. Un evento que terá lugar o día 24 de setembro no parque de Tafisa e que xa ten catro artistas confirmados.
Trátase dun festival dedicado á música urbana no que actuarán Vilán Antillano, Sila Lúa, Hijos de la Ruina, Thom Archi e Dj Groove Amigos. "Haberá máis sorpresitas", asegurou Marta González, propietaria de Maldita Sed, empresa organizadora do festival en colaboración con Industrias Esmerarte, o Concello de Pontevedra e a Xunta de Galicia.
As entradas poñeranse á venda o 17 de agosto a un prezo de saída de 19 euros e poderanse adquirir na páxina web de Ataquilla.
"A idea de organizar un festival así naceu hai anos por parte de varios hostaleiros da cidade, logo cruzámonos con Esmerarte para levar adiante o proxecto e contamos ademais co apoio do Concello", explicou a promotora como frutificou esta iniciativa.
Tanto desde Maldita Sed como por parte do Concello e a Xunta coincidiron ao sinalar que Pontevedra non podía quedar fóra do circuíto de festivais de Galicia. E o nicho que atoparon para esta primeira edición do Río Verbena Fest é o da música urbana. "Leva o nome de verbena porque os estilos irán variando, esta vez pensamos na música urbana para a xeración nova", puntualizou González, destacando que o lugar elixido, nunha ampla zona verde da ribeira do Lérez, "é un enclave privilexiado".
A secretaria territorial da Xunta de Galicia en Pontevedra, Marta Iglesias, puxo en valor a aposta musical do executivo autonómico en Pontevedra coa programación de varios eventos incluídos na programación do Xacobeo. Comezarán as actuacións na cidade do Lérez co concerto de Víctor Manuel, continuarán co festival Ferve e poñerá o selo a finais de setembro o Río Verbena Fest. "Queremos potenciar unha vila fundamental do Camiño Portugués, que está abarrotado e con cifras récord de peregrinos", dixo a representante da Xunta.
En representación do Concello de Pontevedra falou o concelleiro de Desenvolvemento Sostible, Iván Puentes, para agradecer a aposta realizada pola hostalería da cidade, "que é o principal motor de riqueza de Pontevedra". Ademais tamén destacou a "seguridade" que supón contar co apoio de Industrias Esmerarte á hora de organizar un festival destas características.
"Río Verbena Fest enche un baleiro que había en Pontevedra. As rías Baixas son o epicentro desa cultura de festivais que hai en Galicia e Pontevedra non podía non ter un oco neste circuíto de festivais", explicou Puentes unha das razóns que levaron á organización dun festival "que dá un primeiro paso que agardamos que sirva para dar logo outro aínda máis grande".
Coa celebración deste evento tamén pretenden concienciar á cidadanía coa loita contra a emerxencia climática. A localización elixida está tamén relacionada cun modelo de "cidade verde no que o río Lérez é ou símbolo", rematou o concelleiro.
Entradas á venda o 17 de agosto a partir das 12.00 horas en ataquilla.com e rioverbena.com