Pontevedra contará a partir do xoves cun novo espazo expositivo estable. Tras tímidos intentos anteriores, a Casa da Luz sumarase ao circuíto da cidade. Farao cunha exposición moi particular, a que reflicte o proceso creativo que os alumnos do Garaxe Hermético de Kiko Dasilva afrontaron para deseñar un comic sobre a vida do icónico personaxe de misterio creado por Arthur Conan Doyle, Sherlock Holmes.
Trátase dunha banda deseñada feita por 40 persoas ao mesmo tempo. "É a primeira vez que facemos isto", explica o director da escola. Son 96 páxinas que foron deseñadas, guión incluído, en mes e medio de traballo "cando normalmente tardaríase un ano" e aportando cada un dos seus autores as súas mellores habilidades en cada un dos ámbitos creativos.
Segundo Kiko Da Silva, o resultado é "incrible" e tras os tres libros publicados anteriormente polo Garaxe Hermético, a súa edición "pon ou listón moi alto".
Neste comic recóllense catro casos protagonizados polo detective Sherlock Holmes e o universo creado por Conan Doyle, que reflicten a etapa da infancia á madureza deste personaxe.
Un deles está ambientado no Pazo de Lourizán, onde os alumnos fixeron un arduo traballo de investigación gráfica "buscando ideas" e revisando todo este ámbito para recrealo con todo luxo de detalles.
Nesta exposición non só se poderá ver este traballo rematado, senón tamén mostraranse algúns dos bosquexos deseñados durante todo un proceso creativo que, segundo Dasilva, "foi moi laborioso", especialmente polo novidoso desta experiencia.
A exposición, que leva por título Creando nun garaxe, inaugurarase este xoves 23 de xullo ás oito da tarde.