A morte de Javier Fernández Albatros sumiu á sociedade pontevedresa nun profundo pesar. Foi a mediados do pasado mes de xaneiro. Músico, pintor ou fotógrafo son algunhas das súas facetas artísticas, que serán lembradas na homenaxe que ultima o Ateneo de Pontevedra.
Será este venres 12 de abril, a partir das oito da tarde, no Café Bizarro, a cafetería do Club Naval, onde se reunirán os amigos de Albatros para lembrar a unha das persoas que "fixeron todo o posible porque Pontevedra entrase nos circuítos da modernidade".
Así o destacou Xaime Toxo, presidente do Ateneo, que sinalou que foi un "home transversal" a todo o movemento social e cultural que, a partir de finais dos anos 70, protagonizou a efervescencia da Pontevedra daquela época.
Foi unha xeración que activou modelos culturais "moi urbanos e populares", segundo Toxo, baseados na música, nos novos elementos do pop-art, na fotografía ou nos novos formatos que ía xurdindo ao redor da comunicación social.
"Queremos dar a coñecer, recoller e manter esa herdanza, esa memoria do que foi esa xeración, centrada nunha cuestión fundamental para eles, a música", engadiu.
A homenaxe incluirá un coloquio no que os amigos do artista falarán sobre a súa figura desde diversas ópticas, entre elas o seu legado artístico como un home "preocupado polas diferentes correntes da arte" ou a súa traxectoria vinculada á musica e á noite pontevedresa.
O Pub Albatros, que el mesmo abriu na década dos 70, sinalou o presidente do Ateneo de Pontevedra, foi o primeiro establecemento nocturno da cidade "nesa nova liña de entender a noite como un intercambio xeracional".
Así, era habitual que acollese diversas iniciativas artísticas e alí reuníase "todo o que era a masa preocupada pola cultura", situando á cidade de Pontevedra "na modernidade do que despois se puido entender como a movida".
Ademais, a homenaxe incluirá un concerto da banda Black Stones, un grupo que xeracionalmente compartiu toda esa época con Javier Albatros e proxectarase un documental creado por Manolo Yáñez sobre a figura do artista.
Estela, filla de Javier Albatros, agradeceu este acto de "recordo de vida" ao seu pai, para o cal ela cedeu numerosos documentos e fotografías "para poder levalo a cabo".