En apenas dous meses, Pontevedra estará de cheo na semana grande das súas festas. E, como todos os anos, o cartel de concertos será un dos seus maiores atractivos.
A este respecto, segundo puido saber PontevedraViva, tres destas actuacións estarán protagonizadas por Rozalén, Iván Ferreiro e Beret.
Rozalén subirá ao escenario da Praza de España o martes 13 de agosto. A albaceteña é unha das artistas femininas máis reclamadas do panorama musical. Chegará a Pontevedra dentro dunha xira chamada "Cuando el río suena", na que actualmente está a presentar un disco polos seus grandes éxitos.
Cancións tan populares como Comiéndote a besos, La puerta violeta, Será mejor ou Girasoles soarán no seu concerto de Pontevedra que, como o resto da oferta musical das Festas da Peregrina, será de entrada gratuíta.
Iván Ferreiro, artista imprescindible en festivais e concertos por toda a xeografía nacional, será outra das grandes apostas deste ano. Actuará en Pontevedra o venres 16 de agosto.
No seu caso, presentará en directo os seus dous últimos discos, Casa e Cena recalentada, este último unha homenaxe á mítica banda Golpes bajos; pero seguro que haberá tempo para que interprete algúns dos grandes éxitos da súa prolífica carreira.
O terceiro nome que adianta PontevedraViva é o de Beret. Este sevillano, referente dunha música urbana que se move entre o hip hop, rap e reggae, é actualmente un dos artistas de maior progresión da música española e conta cunha ampla lexión de fans. O seu concerto será o sábado 17 de agosto.
Te echo de menos, Ojalá, Vuelve e Lo siento son catro dos seus últimos éxitos musicais, temas que acumulan varios discos de ouro e platino polas súas cuantiosas vendas e que o público pontevedrés poderá escoitar en directo.
O programa completo das Festas da Peregrina, que se integran nas coñecidas como Festas de Verán, desvelarase oficialmente nos próximos días.