Apenas tres días despois de pechar con éxito a súa sexta edición, o festival PortAmérica deu xa os seus primeiros pasos para a próxima. A principal dúbida quedou resolta. De novo, a carballeira de Caldas de Reis, escenario que estreou a pasada fin de semana, volverá acoller esta imprescindible cita musical e gastronómica.
A través das súas redes sociais, PortAmérica anunciou que Caldas volverá ser a sede do festival en 2018, despois de que tanto o concello como os organizadores e todos os participantes manifestasen publicamente estar encantados co resultado da primeira edición na emblemática carballeira.
Non é para menos. Segundo as primeiras estimacións, unhas 18.000 persoas gozaron do festival durante os seus tres días e a boa acollida a este novo espazo foi unánime.
A primeira novidade para 2018 será, en todo caso, as datas. PortAmérica adiantará unha semana a súa cita co calendario festivaleiro nacional.
A súa sétima edición, que volverá reunir a un amplo cartel de grandes estrelas da música nacional e internacional, cun marcado acento no intercambio cultural entre España e América Latina, celebrarase os días 5, 6 e 7 de xullo.
Os abonos poñeranse xa á venda a partir de mañá mércores. Haberá unha cota de entradas cun prezo especial de lanzamento, a través de Ticketea, de 30 euros.