ButacaZero representou este mércores no Teatro Principal de Pontevedra a traxicomedia '32 m2', unha peza de teatro absurdo que aborda as experiencias vividas por Mar e Xan durante os meses que durou o estado de alarma que comezou o 14 de marzo de 2020.
Mar está interpretada por Laura Villaverde e Xan por Xurxo Cortázar. Eles dan vida durante 80 minutos a esta parella confinada nun piso de 32 metros cadrados.
A obra recolle elementos cómicos e tráxicos para reflexionar xunto ao espectador sobre o vivido hai un ano.
Esther F. Carrodeguas e Xavier Castiñeira son os directores do proxecto que se inspiraron nas súas propias vivencias e na obra 'Esperando a Godot' de Samuel Beckett.
Cuestións como a soidade, o abandono, as complexidades das relacións interpersoais ou o estrés e o os ritmos frenéticos impostos na 'vella normalidade' serán algúns dos temas que se visualizarán nesta peza.
A través de elementos cómicos e tráxicos, '32m2' pon o foco sobre a convivencia da sociedade coa precariedade e as desigualdades na súa vida cotiá a través da mirada de Mar e Xan.
Esta parella que se considera a si mesma como 'antisistema' e viven con tranquilidade nun pequeno piso dunha superficie de 32 metros cadrados ata que, de súpeto, un día confinan a toda a poboación.