A noite do venres deixou en Pontevedra sons variados en tres puntos da cidade dentro da programación de Pontevedra Vívese nas Festas da Peregrina 2020.
A banda pontevedresa La Casa de los ingleses ofreceu o pop indie máis estimulante na praza da Ferrería ante numeroso público que segue a este grupo desde o seu primeiro traballo 'Punto de partida' e que levan unha década subíndose aos escenarios.
Na praza de España, á mesma hora, Pel e pau ofrecía un recital de música tradicional. Esta banda presenta o seu último traballo discográfico que leva por título 'Na beira'. A agrupación viguesa fixo vibrar os espectadores que mantiveron as estritas medidas de distanciamento e seguridade sanitaria.
Nas pistas de Campolongo, a actuación correu a cargo do compositor de Ourense Emilio Rúa. Neste caso, a música máis intimista deste intérprete que gravou temas con artistas da talla de Pablo Milanés, Rozalén, Carlos Goñi, Solé Giménez ou a galega Rosa Cedrón congregou a pouco público nunha noite na que se notaba a baixada de temperaturas.
Este sábado 15, día festivo, continuarán os espectáculos infantís na Alameda con 'O Cardume' de Xarope Tulú na Alameda a partir das 19.30 horas e co Rei Midas no Parque de Amalia Álvarez a partir das 20.00 horas.
Os concertos desenvolveranse nos espazos habituais. Ás 22.00 horas comezará o de Moloch na praza da Ferrería, unha banda que realiza música progresiva e experimental. Ás 22.30 horas, o guitarrista Daniel Minimalia subirá ao escenario da praza de España ofrecendo temas do seu álbum 'Orixe', que foi candido aos premios Grammy latinos ao mellor disco instrumental.
E nas pistas de Campolongo, o artista galego Pablo Lesuit, un músico multi-instrumentista, cantante e compositor presentará os seus últimos temas ao público asistente neste tramo final da semana grande das Festas.