O Concello de Barro dá por rematada a programación cultural estival do municipio, que "volveu ser de alta intensidade". O programa ConBdeBarro levou un total de 16 actividades repartidas polas seis parroquias do concello.
ConBdeBarro é unha programación cuxo formato naceu nos meses duros da pandemia, con pequenas actuacións nas que primaba o acento local e destinadas para un público reducido e de todas as idades e gustos.
Desde o goberno local aseguran que o éxito foi tal que se afinzou nos veráns de Barro e as actuacións en pequeno formato chegaron a todas as parroquias e lugares.
Maxia, cine, baile, música tradicional, música de cámara, humor ou rock foron algúns dos xéneros que chegaron este verán a todos os recunchos do concello e que cada ano van enganchando a un maior número de espectadores de todos as idades.