Este martes, día 15, a Sociedade Filarmónica de Pontevedra ofrecerá o segundo concerto da súa tempada musical, e esta vez estará protagonizado polo pianista chinés Jianing Kong, Terceiro Premio do XVIII Concurso Internacional de Piano de Santander 2015. O concerto desenvolverase no Teatro Principal a partir das 20:30 horas.
Nacido en 1986 na provincia de Guangdong, Jianing Kong actuou sempre con gran éxito de crítica no Reino Unido e en Europa continental. Ademais do Premio de Santander, foi galardoado en diversos concursos internacionais de piano, entre eles o Tunbridge Wells International Young Concert Artist (2008), o concurso de Leeds (2009), o de Valsesia (2013) e o Scottish Piano Competition (2014).
Recentemente foi seleccionado pola organización Keyboard Charitable Trust para ofrecer numerosos recitais en salas europeas e americanas, incluíndo entre elas o Steinway Hall de Nova York e o Teatro do Festival de Castleton (Virginia, EEUU). En 2012, a través da Sociedade de Concertos Kirckman, fixo o seu debut no Wigmore Hall de Londres con gran éxito de crítica.
Jianing Kong ofrecerá na Sociedade Filarmónica de Pontevedra un programa con obras de Beethoven e Chopin. Do primeiro, interpretará as sonatas nº 21 "Waldstein" e nº 23 "Appassionata", pertencentes á etapa de madurez do compositor e que constitúen ambas as unha das cimas da súa produción instrumental; de Chopin, os 12 Estudos opus 25, que supuxeron unha importante innovación na técnica pianística.