A saga Apocalipsis Z, coa que o escritor pontevedrés Manel Loureiro saltou á fama, converterase en película. Farao da man de Amazon Prime, que este martes desvelou os novos proxectos de ficción que impulsa en España.
Apocalipsis Z: El principio del fin, segundo destaca a compañía, será unha película de aventuras, acción e supervivencia que estará baseada no libro de Loureiro.
A historia, ambientada en Pontevedra, está protagonizada por un avogado que observa estupefacto o goteo de noticias acerca dunha misteriosa praga que se propaga sen freo por todo o planeta, tras ser liberada desde algún lugar do Cáucaso.
Os infectados polo virus morren, pero só en aparencia, xa que ás poucas horas volven á vida e abalánzanse contra as persoas libres de contaxio, movidos por unha agresividade descoñecida e sen límites.
A partir dese momento, o único obxectivo deste inesperado será tratar de sobrevivir, cruzando o territorio que antes coñecía como Galicia, pero que agora se transformou no inferno na terra.
Apocalipsis Z: El principio del finestará dirixida por Carlos Torrens, un realizador cunha longa experiencia en series de televisión, onde colaborou, entre outras, en Vis a Vis, El ministerio del tiempo, Malaka, El internado: Las Cumbres, Feria ou Sky Rojo.
O seu protagonista será o actor Francisco Ortiz, ao que recentemente puidemos ver á fronte García para HBO, a adaptación da novela gráfica de Santiago García e Luís Bustos. Ademais, participou en Amar es para siempre ou El secreto de Puente Viejo.