O auditorio do Pazo da Cultura encheu durante dous días as súas butacas con risos e aplausos de centos de escolares de infantil e primaria, que participaron nunha experiencia única: "In Gallaecia, mulieres mythorum!", unha proposta innovadora da Orquestra Sinfónica de Pontevedra.
Durante catro sesións repartidas entre o martes e este mércores, 25 centros educativos da cidade e a súa contorna, con preto de 2.500 estudantes, mergulláronse nunha viaxe que combina música, circo e narración audiovisual.
A historia dunha avoa e a súa neta, interpretadas por Laura Mourín e Miriam Crespo de Asaco Circo, serviu como fío condutor para descubrir tanto seres da mitoloxía galega como figuras femininas reais que deixaron pegada.
As heroínas de Sálvora, as lavandeiras de San Simón ou as irmás Touza compartiron protagonismo coa Maruxaina, a Coca ou o Lobishome, entre outros personaxes.
A música, elemento central da proposta, correu a cargo dun quinteto de metal, un piano e un violín, dirixidos por Lara González e acompañados pola voz de Cristina Suárez.
Os números circenses de Asaco Circo, con Joao de Araujo completando o elenco, transformaron conceptos abstractos en imaxes visuais sorprendentes: zancudos, malabares con luces e dagas, trasnos e pompas de xabón deron forma ás criaturas míticas.
Antes de asistir ao espectáculo, os centros educativos recibiron material didáctico para preparar esta experiencia nas aulas.
A partir desta premisa, o alumnado traballou no recoñecemento de instrumentos, aprenderon cantigas en galego e afondaron na historia de mulleres galegas relevantes como a compositora Eugenia Osterberger. Ademais, crearon debuxos das figuras mitolóxicas que logo foron proxectados durante o espectáculo.
Esta proposta, entre a Orquestra Sinfónica e o Concello de Pontevedra, pretende achegar a cultura galega aos máis pequenos poñendo en valor o labor das mulleres na historia de Galicia.
