O cantante Gonzalo Arca escolle Vilagarcía de Arousa para iniciar a presentación do seu primeiro LP en solitario "Ni el tiempo ni la distancia", un traballo que se poderá escoitar no emblemático Salón García o venres 4 de abril.
O concerto, que comezará ás 21:00 horas, permitirá ao público achegarse ás dez cancións que compoñen este álbum, no que se fusionan o pop e o rock.
As entradas para o espectáculo xa están á venda por 15 euros nos establecementos Duende, Miúdo, La Bolsa e Chirin-Jito, mentres que o día do concerto o prezo ascenderá a 18 euros na billeteira.
"Trátase dunha oportunidade única na que desfrutar deste artista polivalente que leva 25 anos traballando", destacou esta mércores Sonia Outón, concelleira de Cultura de Vilagarcía, durante a presentación do evento.
A edil subliñou a profundidade das letras do novo disco, que saía á luz o 1 de febreiro, que inclúe temas como "Dama de Las Hortensias", "Chulería Tropical" ou "El Último Tren".
Para esta nova etapa, Arca estará acompañado por unha banda de luxo formada polo guitarrista vilagarcián Pablo Pérez, colaborador habitual de Loquillo, o teclista Xabier Viéitez, o baixista Jesús Vidal e o batería Nico Rodríguez.
"Son músicos que levan tanto tempo coma min neste oficio, polo que o concerto será todo un espectáculo", afirmou o propio cantautor na presentación.
Aínda que o artista ten previsto realizar unha xira por Galicia e non descarta chegar a Madrid, quixo comezar este novo proxecto na cidade que o viu medrar artisticamente.
O músico arousán iniciou a súa carreira musical no ano 2000 con 17 anos sendo líder da banda Vado Permanente e durante a súa traxectoria tamén formou parte da banda Sugar Mountains.
En 2014 publicou un mini LP en solitario, con seis temas, baixo o título "Alone at the crossroad", converténdose nun notable éxito dentro do panorama da música independente.