Xosé Filgueira Valverde volveu ser o protagonista este sábado. O auditorio da Sede Afundación de Pontevedra rendeulle unha máis das homenaxes destes días con motivo do Día das Letras Galegas, que este ano se dedica ao intelectual pontevedrés e, polo tanto, teñen a cidade do Lerez como eixe fundamental. O peculiar deste último é que se realizou en clave musical.
Entre as múltiples facetas profesionais de Filgueira Valverde figura o seu apoio á creación da Sociedade Coral Polifónica de Pontevedra ou o impulso do Festival da Canción, de modo que tamén nesta faceta recibiu a merecida homenaxe a través do 'Concerto das Letras'.
A actuación incluíu a estrea dunha obra de Xavier de Paz sobre textos do Xosé Filgueira Valverde, unha composición de Joly Braga Santos sobre textos de Rosalía de Castro e catro cancións de José Castro "Chané" sobre textos de Curros Enríquez.