O festival internacional Novos Cinemas celebrou este sábado unha cerimonia de entrega de premios na sala Zennet de Pontevedra, onde 'Eastern Anthems', dos directores Matthew Wolkow e Jean-Jacques Martinod, acadou o galardón principal do certame.
O filme, unha road movie que reflexiona sobre os Estados Unidos durante a pandemia da Covid-19, destacou "pola sublime maneira de navegar e combinar diferentes linguaxes plásticas", segundo valorou o xurado oficial.
A obra, unha coprodución entre Canadá, Estados Unidos e Ecuador, tamén recibiu o Premio á Mellor Dirección outorgado polo Xurado Novo.
A película venezolana 'Los capítulos perdidos', de Lorena Alvarado, foi outra das grandes protagonistas da noite ao conseguir o Premio do Xurado da Crítica e unha Mención Especial do xurado oficial, que salientou a súa innovadora aproximación á memoria e á perda.
Entre outros galardóns destacados, 'The Human Hibernation', dirixida por Anna Cornudella, fíxose co Premio do Público, un recoñecemento que chega semanas antes da súa participación nos prestixiosos Premios FEROZ.
O palmarés completouse con 'Los reinos', de Manuel Muñoz, que gañou na sección Latexos, e 'Configuración de un umbral', de Paolo Natale, Daniel Rodríguez e Sandra del Moral Abolafia, que se fixo co premio da sección CERES.
Esta edición tamén trouxo unha importante novidade coa inauguración de Terra, unha sección do #LAB centrada en impulsar proxectos galegos en desenvolvemento, onde a cineasta Alba Gallego presentou o seu proxecto 'Lembrarás como bailabas', que recibirá o apoio da mentora Lorena Morín no MECAS.
O Festival finalizará este domingo 15 cunha programación que será clausurada coa estrea en Galicia da película 'Te separas mucho', da directora Paula Veleiro López, no Teatro Principal.
PREMIOS NOVOS CINEMAS 2024
Xurado Oficial
* Premio Novos Cinemas: Eastern Anthems, de Matthew Wolkow e Jean-Jacques Martinod.
* Mención Especial: Los capítulos perdidos, de Lorena Alvarado.
Xurado Latexos
* Premio: Los reinos, de Manuel Muñoz.
Xurado Ceres
* Premio Ceres: Configuración de un umbral, de Paolo Natale, Daniel Rodríguez e Sandra del Moral Abolafia.
* Mención Especial: Al mirar a lo lejos, de Marta Lara Pérez.
Xurado da Crítica
* Premio do Xurado da Crítica: Los capítulos perdidos, de Lorena Alvarado.
Xurado Novo
* Premio á Mellor Dirección da Sección Oficial: Eastern Anthems, de Matthew Wolkow e Jean-Jacques Martinod.
* Mención Especial: Los capítulos perdidos, de Lorena Alvarado.
Premio do Público
* The Human Hibernation, de Anna Cornudella.