Poucas bandas tiveron tanta proxección nos últimos anos como Arde Bogotá. O seu nome atrae a miles de seguidores alá por onde van e, como era previsible, tamén sucedeu en PortAmérica, onde eran o gran atractivo da súa terceira e última xornada.
Cun directo cada vez máis sólido, os de Cartaxena demostrou unha vez máis que o seu éxito non é froito da casualidade. Cun público entregado desde os primeiros acordes, a banda liderada por Antonio García fixo vibrar a toda a Azucreira de Portas.
Qué vida tan dura, Los perros ou La Salvación, que interpretaron xunto a Tanxugueiras na que foi a gran sorpresa da noite, tres temas xa convertidos en himnos, desataron o delirio entre os asistentes ao festival, que xa quentaran cos artistas que lles precederon.
Así, tras un inicio protagonizado por Técnicas e Procedementos, unha das bandas do programa Sonidos Mans da Fundación Paideia, soou no escenario de PortAmérica o garage rock de Mamasunción ou o rock dos veteranos Burning.
O folk irreverente de Rodrigo Cuevas foi outro dos grandes atractivos desta terceira xornada do festival, xunto coa cantante mexicana Lila Downs ou o colombiano Juanes, que interpretou todos os seus grandes éxitos nun concerto que precedeu a Ilegales e El Drogas.
A Randeeira Asasina e o mexicanos Sonido Gallo Negro foron os encargados de animar a velada ata altas horas da madrugada.
No ShowRocking, pola súa banda, cociñaron Javi Estévez (La Tasquería),Antonio Arrabalde (La Jamada), Dani Carneo (Kaleja), Álex Marugán (Tres por cuatro), Miguel Molina (Molino del Puente), Alejandra Herrador + Emanuel Carlucci (Atalaya),Édgar Núñez (SUD 777), Iván Domínguez (Nado), Diego Guerrero (Dstage) e Catalina Vélez (Domingo de Vereda).
Dos seus fogóns saíron, entre outras propostas, brioche de cordeiro, empanadillas criollas, albóndegas de cola de touro, coello en escabeche, tartar de salchichón, arroz negro con luras, tostadas de camarón, lacón asado ou arepas con leitón asado.