O fenómeno fan volveu á praza de España coas Festas da Peregrina. Nesta ocasión, un dos grupos musicais de moda, os madrileños Dvicio, subía ao escenario para que os milleiros de persoas, a maioría delas adolescentes, non pararan de berrar durante un concerto que desatou paixóns.
A banda interpretou algúns dos seus éxitos como 'Justo ahora', 'El secreto' ou 'Quizás', que foron coreados polos mozos do público.
O grupo fixo un selfie ao final do concerto cos seguidores de fondo, que subiron rapidamente á rede social Twitter destacando a incríble noite que tiñan vivido na cidade do Lérez.
Esta noite remata a semana grande das Festas cun concerto de Corais na Ferrería a partir das 21.00 horas e a actuación de Loquillo na praza de España a partir das 22.30 horas. Os fogos artificiais serán ás 24.00 horas na avenida de Corbaceiras.