"Cine máis comprometido, crítico, alternativo, que nas máis das veces non entran nos circuítos comerciais, cinema feito dende a excelencia". Nestes termos falou de Novos Cinemas a concelleira de Cultura, Carme Fouces, para engadir que o Concello aposta de xeito claro polo Festival Internacional de Cinema de Pontevedra: "sería unha irresponsabilidade non facelo".
Carme Fouces presentou este sábado a terceira edición do Festival Internacional de Cinema de Pontevedra -Novos Cinemas- no Espazo Concello de Culturgal, a feira das industrias culturais galegas que se está a desenvolver esta fin de semana no Recinto Feiral de Pontevedra. Ao seu carón estaban dous dos promotores do proxecto, Suso Novás e Ángel Santos.
Novos Cinemas-03 terá lugar do 11 ao 16 de decembro en Pontevedra, unha cita que porá o foco sobre unha cidade de cine. O Festival Internacional de Cinema de Pontevedra, presenta os 15 filmes que formarán parte das súas seccións competitivas: a Sección Oficial e a Sección Latexos.
Trátase dunha selección de primeiras e segundas obras de cineastas emerxentes procedentes de lugares como Canadá, USA, Francia, Portugal, China, Brasil, España, Ecuador ou Arxentina. Ademais inclúe unha retrospectiva da cineasta lisboeta Teresa Vilaverde.