O Teatro Principal acolleu este sábado a primeira parada do ciclo 'Resoan' deste 2025, un concerto de Kiki Morente.
Este artista procedente dunha longa tradición de cantaores e guitarristas, fillo de Enrique Morente, presentou en Pontevedra a súa xira 'Azabache', na que mestura o seu legado do flamenco clásico con referencias a Dulce Pontes, Leonard Cohen ou Pat Metheny.
Con este ciclo musical, o Concello busca traer a Pontevedra artistas de primeiro nivel nun "cruce de camiños musicais a través da estética, as paisaxes sonoras, o tempo e o territorio".
Entre marzo e maio, son cinco as citas programadas en tres espazos distintos: o Teatro Principal, o auditorio do Pazo da Cultura e o recinto feiral. A deste sábado foi a primeira.
O CICLO
O ciclo continuará o 12 de abril con Rodrigo Cuevas, quen ofrecerá o seu espectáculo 'La Romería' no recinto feiral ás 19:00 horas. Poranse á venda unhas 4.000 entradas.
A Banda da Loba presentará o seu "Lovísmo" o venres 2 de maio ás 21:00 horas no Teatro Principal.
O sábado 10 de maio, tamén ás 21:00 horas no Teatro Principal, actuarán Xabier Díaz e Adufeiras de Salitre, nunha homenaxe ás pandereteiras, ás que se dedica este ano o Día das Letras Galegas.
O ciclo pechará o sábado 24 de maio ás 20:30 horas no auditorio do Pazo da Cultura con Abraham Cupeiro e o seu espectáculo "Loira".
As entradas xa están á venda a través de Ataquilla, agás no caso de Rodrigo Cuevas, cuxos billetes se poden adquirir en Woutick.