Este venres 14 de xullo comeza a 24 edición do Memorial Ricardo Portela con numerosas actividades culturais, que se desenvolverán na contorna da Ferrería, relacionadas co gaiteiro de Viascón.
Demetrio Gómez, concelleiro de Festas, presentaba este mércores a programación deste evento acompañado do vicepresidente da Asociación de Gaiteiros Galegos, Oli Xiráldez, e de Alberto Pires, vogal deste colectivo.
Este ano realizarase unha homenaxe, como xa é tradición, a unha figura destacada da música tradicional e escolleuse á figura de Concha de Luneda, Concepción Rodríguez Álvarez, unha veciña de Arbo, que faleceu en Luneda, na Cañiza.
Concha de Luneda caracterizouse por ser unha muller "brava", portadora de cantigas e referente para moitas agrupacións que traballan a música tradicional. "Tiña un xeito moi característico de tocar o pandeiro e a pandeireta; cantaba, ademais, moi ben",, sinalaba Pires durante a presentación.
Recalcou que "foi un exemplo de muller e loitadora ao longo de toda a súa vida", destacando a súa imaxe como exemplo das mulleres galegas que deixan pegada, tras ter que emigrar a Barcelona e aprender a ler e escribir aos 30 anos. "Aprendeu a dividir antes que a sumar", explicou o representante dos Gaiteiros Galegos, ao relatar a historia desta muller que sufriu os estragos da Guerra Civil.
O programa durante os tres días comezará coa XXI Mostra de Artesáns de Instrumentos Tradicionais no Paseo de Antonio Odriozola. O venres terá un horario de 17.00 a 21.30 horas. O sábado e o domingo abrirá en horario de mañá: de 11.30 a 14.00 horas; e de tarde, de 17.30 a 21.30 horas.
O resto do programa inclúe as seguintes actividades:
Venres 14
17.30h - Pasacalles de Armandas de Laraño, Gaiteiros das Rías Baixas, Millarancos e Músicas da Redonda
21.00h - Concerto de Lagharteiras na Praza da Ferraría
Sábado 15
11.30h e 18.00h - Pasacalles de Ansuiña, Candaira, Cántigas e Frores, e Picuiña - Prazas e rúas da cidade
21.00h - Homenaxe a Concha de Luneda na Praza da Ferraría
Domingo 16
11.30h e 18h - Pasacalles de Aires do Coutado, Boudebou, Os Outros Feirantes e Seimeira polas rúas e prazas da cidade
21.00h - Concerto de Os Folieiros na Praza da Ferraría