Tres son xa os artistas que formarán parte da terceira edición do festival Costa Feira, que se celebrará este verán en Sanxenxo. O último nome, por agora, en confirmarse foi o do artista colombiano Camilo.
Camilo, unha das grandes estrelas da música en español a nivel mundial, ofrecerá en Sanxenxo o que será o seu único concerto en Galicia durante este ano. Farao o martes 19 de agosto, segundo confirmaron este luns os seus organizadores.
Ao longo da súa carreira, o autor de temas como 'Vida de rico', 'Bebé' ou 'Tutú', gañou seis premios Latin Grammy e editou catro discos, o último deles 'Cuatro' (2024).
O seu talento e unha conexión sen fisuras coa súa tribo -como chama aos seus fans- levárono a triunfar alá por onde vai. Máis de medio millón de espectadores gozou dos concertos que ofreceu no noso país nos últimos anos.
As entradas para o concerto de Camilo en Sanxenxo sairán á venda este mércores 26 de marzo.
A terceira edición de Costa Feira xa anunciara previamente os protagonistas de dous dos seus concertos máis destacados.
Son os que darán Leiva (2 de agosto) e Manuel Carrasco (9 de agosto).
A organización anunciará en próximas semanas máis nomes e datas para as actuacións que formarán parte da súa oferta musical para este verán.