"Non chas quero, non chas quero, rabizas do teu nabale, non chas quero, non chas quero, que me poden facer male" é o retrouxo máis coñecido do movemento Bravú, grazas aos históricos Os Diplomáticos de Monte Alto, que alá pola década dos noventa, liderados por Xurxo Souto, ofrecían este hit festeiro e reivindicativo da música popular galega.
Trinta anos máis tarde, o auditorio do Pazo da Cultura, dentro da programación do Culturgar, celebraba tres décadas dun movemento de orgullo identitario.
O evento, que congregou a veteranos e novas xeracións, incluíu a proxección do documental 'Bravú XXX', producido por Nós Televisión, e un concerto que uniu no escenario á Banda Xangai, liderada tamén por Xurxo Souto, e ás mozas pontevedresas de Rager.
"Un evento único e irrepetible, mesmo subversivo", en palabras de Souto, figura emblemática do movemento. O artista destacou a importancia do diálogo interxeracional que se produciu no escenario, onde "músicos veteranos dialogaron con rapazas de 15 anos".
O documental 'Bravú XXX' recolle a historia deste movemento musical nado nos 90, que mesturou rock con tradicións rurais e realidade urbana, apostando polo galego nas letras.
"Hai unha xeración que non se pode entender sen o Movemento Bravú", afirma Ana Viqueira, guionista e codirectora do filme.
O Bravú xurdiu como expresión propia dos fillos de campesiños e pescadores e da mocidade das barriadas urbanas, congregando a bandas como Diplomáticos de Monte Alto, Os Rastreros, Os Impresentables, Os Herdeiros da Crus e O Caimán do Río Tea, entre outras.
O seu son mesturou influencias do heavy metal coa música tradicional galega, desde as orquestras de verbena ata as pandeireteiras.
Este sábado 30 de novembro continuará a música en vivo cos concertos no Recinto Feiral de Pava (ás 19.00 horas) e de Caamaño&Ameixeiras (ás 20.00 horas) no escenario C.
Consulta a programación do Culturgal nesta ligazón.