Pontevedra prepárase para acoller esta fin de semana, do 29 de novembro ao 1 de decembro, unha nova edición do Culturgal, a feira das Culturas Galegas, que ofrecerá unha programación ampla e diversa.
No Recinto Feiral do Pazo da Cultura están previstas diversas actividades entre as que destacan a arte contemporánea, cine, teatro, música, literatura e reflexión social como piares dun evento que busca conectar co público e poñer en valor a riqueza cultural de Galicia.
Un dos grandes atractivos desta edición será o Espazo Arte, que crece como unha auténtica feira de arte contemporánea.
A iniciativa aposta polas galerías e espazos de arte que representan modos de traballo novidosos en Galicia, explorando as relacións entre a arte e a sociedade.
O público asistente terá a opción de adquirir pezas de arte cun rango de prezos que vai desde os 100 ata os 10.000 euros.
Entre as propostas destacadas atópase a de Pombal Gallery, que presentará 'A Invitación', unha iniciativa de arte social que busca mobilizar ao público ofrecendo transporte, entradas á feira e un “petisco-pack”.
Tamén haberá performances como as do ciclo 'Neodoctrinas', comisariado por Lupercais Arte (Lucía Estévez e Lucía Leirós), e a intervención de Andrea Mosquera Guerrero, da Galería Sarao Studio.
A programación complétase con obradoiros, como o de Xosé Vilamoure (galería Dodo Dadá) e o de cianotipia (galería La Doce), así como mesas de debate sobre temas como o compromiso social na arte (A Colectiva) ou os espazos alternativos para a creación artística (Apo'strophe.arte).
CINEMA: DEBUT DE ZELTIA OUTEIRIÑO
O cinema terá un protagonismo especial coa proxección de 'Filmei Paxaros Voando', o debut da cineasta galega Zeltia Outeiriño, que abrirá a programación cinematográfica o venres 29 ás 19.00 horas.
A película, que xa emocionou no Festival Cineuropa e foi recoñecida con unha mención especial no Festival L’Alternativa de Barcelona, reflexiona sobre o desarraigo, os coidados e o duelo a través dunha mirada autobiográfica.
O filme, unha coprodución de Ringo Media e Sétima, narra o regreso de Zeltia a Galicia tras 20 anos en Barcelona para recuperar a memoria do seu tío Antonio, un artesán téxtil.
Este reencontro leva á directora a explorar a relación coa súa nai Socorro, cuxo empeoramento de saúde abre un novo camiño de amor e coidados. Parte do equipo estará presente na proxección para compartir impresións co público.
Ademais, ata o domingo proxectaranse outras producións galegas como 'Os espazos en branco', 'Aurora', 'As Neves', 'Biopalula', 'Los Saldos' e '+Cuñados'.
A programación de Culturgal inclúe actividades para todos os gustos e idades, desde concertos e presentacións literarias ata espazos dedicados á gastronomía e ao comercio cultural.
Toda a programación está dispoñible nesta ligazón.