O centenario da chegada de Alfonso Daniel Rodríguez Castelao a Pontevedra celebrouse este xoves en clave musical. A Sociedade Coral Polifónica de Pontevedra ofreceu un concerto de homenaxe na sede de Afundación en Pontevedra que permitiu ver exposto un dos panos orixinais con representacións realizados polo propio Castelao, que non se vía en público desde a súa última restauración no ano 2000.
A Coral Polifónica, dirixida por Nanette Sánchez Ordaz, ofreceu un programa en dúas partes no que interpretaron catorce pezas, entre elas Ai flores do verde pinho (cantiga de amigo del siglo XIII), En Ávila mis ojos, Amate mi ben mío de Luca Marenzio, Benedictus de Salvador Giner Vidal, Tres cantigas de Pontevedra, de Agustín Bertomeu de Salazar ou Si vas a San Benitiño, de Antonio Blanco Porto.
Pilar Baamonde Lusquiños, como soprano, Rosa María González Prieto, como contralto, Xosé Luís Álvarez González, tenor, e Juan Laureano González Torres, como baixo, foron os catro solistas do concerto.
O pano que se puido ver sobre o escenario representaba ao rei David, o monarca músico adoptado como emblema pola coral, e é un dos que se utilizaron no primeiro concerto autónomo ofrecido o 23 de marzo de 1926 pola Sociedade Coral Polifónica de Pontevedra, da que formou parte Castelao primeiro como cantor fundador e posteriormente, entre 1929 e 1932, como presidente.