Unha curiosa aterraxe produciuse este domingo no Teatro Principal. Unha nave espacial, na que viaxaba un valente astronauta, chegou a un planeta descoñecido. Alí encontrouse cunha extraterrestre que, ao igual que el tamén estaba de exploración. E as testemuñas deste encontro, os nenos que encheron o patio de butacas do recinto para gozar desta nova entrega do ciclo Domingos do Principal.
A compañía galega Teatro Ghazafelhos representou sobre o escenario pontevedrés o espectáculo 3, 2, 1..., unha obra de teatro xestual e mímica, acompañado da manipulación de monicreques e obxectos e moita música.
Foi un espectáculo repleto de humor e tenrura que chegou ao corazón dos espectadores pontevedreses, especialmente dos máis novos.
Con esta obra, Domingos dos Principal tómase un merecido, aínda que breve, descanso. Deixa paso ao Entroido e regresará o domingo 22 de febreiro coa representación de As fabas máxicas, obra de Caramuxo Teatro.