Madrileños e franceses, a orixe maioritaria dos turistas que visitan Pontevedra
Por Alejandro Espiño
O balance da actividade da oficina turística de Visit Pontevedra durante os meses de xullo, agosto e setembro reflicte, entre outros datos, que Madrid -no ámbito nacional- e Francia -no internacional- son os lugares maioritarios de orixe dos turistas que visitan Pontevedra.
Un de cada cinco visitantes que pasaron por estas dependencias municipais no verán, 7.408 dun total de 38.166, eran madrileños, segundo os datos desvelados polo Concello.
Andaluces (4.960) e cataláns (3.206) completan os primeiros postos desta clasificación, no que tamén aparecen a Comunidade Valenciana (2.816), Castela e León (2.785) ou Euskadi (2.405).
Pola súa banda, os turistas franceses volvéronse a impoñer aos portugueses, país que tradicionalmente adoitaba achegar un maior número de visitantes. Da rexión gala chegaron 766 persoas á oficina de turismo ao longo dos meses de xullo, agosto e setembro.
Portugal (673), Italia (472), Alemaña (456) e Estados Unidos (447) son os seguintes lugares de procedencia por número de visitantes. O 'top 10' complétase con turistas que chegaron de Arxentina, Reino Unido, México, Países Baixos e Brasil.
Ademais, 2.583 turistas participaron nas visitas guiadas organizadas durante os meses de verán, dos cales 2.467 eran visitantes nacionais e 116 procedentes do estranxeiro.