Case 13.000 estudantes de Pontevedra volven o luns a clase en Infantil, Primaria, ESO e Bacharelato
Por Alejandro Espiño
O inicio do curso escolar está ao virar a esquina. A partir do próximo luns 11 de setembro, as aulas de todos os colexios galegos retomarán a súa actividade. Farano, segundo os datos de Educación, con menos alumnos e máis profesores.
Así, 311.823 nenos e nenas de toda Galicia afrontarán a volta ao cole en Infantil, Primaria, Educación Especial, ESO e Bacharelato, entre centros públicos, concertados e privados.
Son 2.409 menos que o curso anterior. O maior descenso de alumnado rexístrase en Infantil, con case tres mil alumnos menos. Na ESO, pola contra, é onde haberá máis estudantes que no curso 2022-2023, ao sumarse 1.358 alumnos máis que o pasado ano.
O conselleiro de Educación, Román Rodríguez, defendeu que o sistema público contará con 370 profesores máis que no curso 2023-2024, ata chegar a un total de 31.044, para un conxunto de alumnos que suman 225.013 nenos e nenas, repartidos en 11.924 aulas.
No caso de Pontevedra, segundo as estatísticas das matrículas formalizadas, haberá 12.765 estudantes nas diferentes etapas educativas. Son 122 menos que o curso pasado.
De todos eles, 1.849 farano en Educación Infantil, 5.062 en Educación Primaria, 92 en Educación Especial, 4.102 na ESO e 1.660 en Bacharelato.
Vilagarcía, cun total de 4.740 estudantes; Marín, con 2.804; Sanxenxo, con 2.145; Cambados, con 1.931; Poio, con 1.751: ou Caldas, con 1.422; son outros dos municipios que contarán con maior número de alumnado na área de influencia de Pontevedra.
Relacionadas:
-
As aulas volven estar cheas no primeiro día do novo curso escolar
Por Alejandro Espiño & Mónica Patxot |
-
Exame previo ao inicio do curso nos colexios de Poio
Por Redacción |
-
As aulas móbiles do instituto Valle Inclán instalaranse a partir do 12 de outubro
Por Natalia Puga |
-
O campus prepárase para o inicio do novo curso universitario
Por Redacción |