O Sergas realizará un cribado entre os marinenses de 50 a 64 anos
Por Redacción
O Servizo Galego de Saúde realizará a próxima semana un cribado masivo en Marín para intentar frear a expansión da covid-19, que nos últimos días se disparou na localidade e obrigou ao comité clínico de espertos que axudan á Xunta de Galicia na xestión da pandemia a activar o nivel medio de restricións.
A alcaldesa, María Ramallo, anunciou este mediodía a realización deste novo cribado masivo a próxima semana e o Concello deu a coñecer que este sábado hai en Marín 44 casos activos de covid-19, 2 máis que o venres.
O novo cribado realizarase o mércores, o xoves e o venres en horario de mañá e de tarde no pavillón da Raña e estará dirixido á poboación de Marín que ten entre 50 e 64 anos, sobre 4.700 persoas, segundo as cifras facilitadas polo Concello.
Segundo explicou a alcaldesa, esta é a franxa de idade que na que máis incidencia de casos positivos hai neste momento.
As persoas convocadas recibirán a súa cita vía SMS. Indicaranlle o día e a hora á que teñen que acudir ao pavillón deportivo para realizar a PCR.
O obxectivo deste cribado é o de conter o máximo posible a suba de contaxios que se está a producir nos últimos días. Ademais, o Concello lembra que está activo o cribado masivo con tests de saliva nas farmacias dirixido á rapazada de entre 12 e 17 anos.
A alcaldesa chama á participación nestes dous cribados porque "é o xeito máis rápido e eficaz que temos de detectar posibles casos asintomáticos e, por tanto, frear posibles cadeas de contaxios que fagan aumentar o número de casos activos".
Ramallo pediu tamén "moitísima responsabilidade e precaución" á veciñanza en xeral, pedíndolles que cumpran as normas sanitarias vixentes, especialmente no que respecta á hostalaría e ás reunións sociais.
Relacionadas:
-
A alcaldesa de Marín, en corentena familiar polo positivo dun dos seus fillos
Por Redacción |
-
Cribado entre alumnado e profesorado do CPR A Inmaculada tras detectarse un brote con 13 positivos
Por Redacción |
-
Continúa a progresión ascendente de casos activos por covid-19 que se sitúan en 448 na área sanitaria
Por Redacción |
-
Mellora a situación na Illa, que pasa de nivel alto a medio, mentres O Grove segue coas restricións máximas
Por Natalia Puga |
-
María Ramallo pide á poboación xuvenil que participe no cribado nas farmacias
Por Redacción |
-
O cribado feito en Marín revela trece casos positivos de covid 19
Por Redacción |