Extinguen un lume orixinado en matogueiras achegadas ás instalacións de Ence
Por Anxo Lourido
Os bombeiros de Pontevedra interviñan minutos antes das 15.00 horas deste venres para apagar un incendio que se rexistraba nas inmediacións do recinto que a empresa pasteira Ence ocupa en Lourizán.
Un particular que paseaba por esta zona alertaba aos bombeiros da presenza de lume entre a maleza que se atopa nese espazo situado próximo á antiga vía do tren e a Rúa Rosalía de Castro, a estrada entre Pontevedra e Marín.
Segundo explicaban desde o Parque Municipal de Bombeiros, traballadores de Ence tamén chamaron avisando da presenza de fume nesa contorna, que se atopa preto a uns silos de almacenaxe de estelas.
O lume producíase na zona perimetral das instalacións que ocupaba a fábrica de Elnosa e a escasa distancia do recinto de Ence. Os bombeiros actuaron de inmediato apagando as lapas e os traballadores da factoría colaboraron tamén nos labores para evitar que o lume se propagase cara ao interior desde as matogueiras e as silvas, que comezaran a arder por causas aínda por determinar.
A dirección de Ence Pontevedra sinala que a orixe do incendio non se atopa relacionada con ningunha actividade que se execute no interior da fábrica e sinala que non se produciron danos en ningunha das infraestruturas nin tampouco danos persoais.
A intervención foi rápida, segundo manifestaban os bombeiros, ao tratarse dunha zona de restrollos e non resultou difícil controlar o lume.