San Xurxo de Sacos celebra este sábado a III Baixada de Carrilanas
Por Redacción
O alcalde de Cerdedo-Cotobade, Jorge Cubela, e representantes da mocidade da parroquia de San Xurxo de Sacos veñen de presentar a III Baixada de Carrilanas Carballeira de San Xusto, que se celebrará neste emblemático espazo este sábado, 10 de agosto, a partires das 16.00 horas. Esta proba está organizada polo Concello e conta coa colaboración do citado grupo de traballo xuvenil e da Federación Galega de Deportes de Inercia (FGDI).
Esta proba, xa plenamente consolidada no calendario do Campionato Galego da modalidade, vén de pechar a súa inscrición cunha elevada cifra de participantes, xa que serán 24 deportistas, de ata nove categorías distintas e con representación local, os que tomen a saída.
A baixada desenvolverase nun espectacular treito de 1.200 metros, que se ampliou o ano pasado con respecto ao percorrido da primeira edición fixado en apenas medio quilómetro. Así, os participantes realizarán un vertixinoso descenso cheo de curvas pechadas desde o cruce coa estrada N-541 ata a contorna da carballeira de San Xusto.
Cubela amosouse convencido de que esta carreira vai "volver a ser un gran éxito, como xa foi nas dúas primeiras edicións" e quixo agradecer o traballo da mocidade de San Xurxo de Sacos e da federación en toda a organización así como o seu inxenio "por seguir apostando por actividades novidosas que achegarán moita xente ata o noso municipio".
Finalmente, amosou o seu convencemento de que esta carreira "seguirá medrando e consolidándose no calendario galego pola espectacularidade da baixada e o gran traballo da nosa xuventude".