Sete persoas, entre elas tres menores, feridas nun accidente de tráfico en Sanxenxo
Por Redacción
Sete persoas resultaron feridas na colisión entre dous coches en Sanxenxo. O sinistro rexistrouse preto das once da noite na vía rápida do Salnés.
Segundo informou o 112 Galicia, o choque entre os dous turismos, que se produciu de maneira frontolateral, foi no punto quilométrico 21, á altura da saída de Adina.
Ao lugar do accidente trasladáronse as urxencias sanitarias do 061, a Garda Civil de Tráfico, o GES de Sanxenxo e os Bombeiros de Ribadumia.
As sete persoas que viaxaban nos dous coches foron atendidas no lugar, entre elas tres menores, aínda que as súas lesións non revisten gravidade.