Cortes de tráfico polo asfaltado das rúas Rouco e Pai Amoedo
Por Redacción
Traballos de pavimentación parcial nas céntricas rúas Rouco e Pai Amoedo, que nalgúns puntos presentan un mal estado de conservación, provocarán restricións de circulación durante dúas xornadas, o martes 30 e o mércores 31 de maio.
A Policía Local elaborou un plan de tráfico para minimizar o efecto dos cortes de circulación dando alternativa aos condutores e ao servizo de carga e descarga.
Para minimizar o impacto, o corte de ambas as rúas realizarase en horario de 9:15 a 13:30 horas e de 15:00 a 19:30 horas.
Na rúa Rouco prohibirase o estacionamento desde as 8:00 horas do martes. Ademais restrinxirase o acceso á praza de Barcelos, permitíndose só o paso ao aparcadoiro público, aos garaxes e aos servizos de carga e descarga.
Pola súa banda en Pai Amoedo desviarase a circulación que baixe por Cobián Roffignac cara á rúa Santa Clara, que cambiará provisionalmente o seu sentido de circulación.