Vilagarcía ultima a posta a punto das súas praias
Por Redacción
O departamento de Medio Ambiente e o servizo de limpeza do Concello de Vilagarcía comezou esta semana os traballos de posta a punto das praias do municipio co obxectivo de que os areais presenten a súa mellor imaxe de cara ao período vacacional da Semana Santa para que os veciños e visitantes poidan gozar delas nas mellores condicións.
Os traballos realizaranse nas praias de Preguntoiro (Vilaxoán), O Campanario (Bamio) e Concha-Compostela (Vilagarcía) e consisten tanto na limpeza dos areais propiamente dita como na revisión dos servizos.
Durante a semana que agora se pecha leváronse a cabo labores de cortado de herba e maleza nas inmediacións dos areais por parte dos operarios municipais, mentres que as máquinas de Cespa comezaron a recollida de algas e desperdicios arrastrados polo mar ás praias, ademais de empezar a cribar a area.
Os traballadores do Concello tamén están revisando todos os servizos e realizando as reparacións e reposición de material que sexa preciso, en especial as duchas, lava pés e fontes, así como as papeleiras.
O concelleiro de Obras e Servizos, Lino Mouriño, comentou que durante a Semana Santa abriranse ao público os aseos da paria do Campanario (os da Concha Compostela están abertos todo o ano para dar servizos aos usuarios do paseo marítimo). Durante o período vacacional a actuación da maquinaria de limpeza dos areais será diaria excepto se chove, xa que nesas condicións é de supoñer que non haberá bañistas nas praias.
A posta a punto dos servizos rematarase nos primeiros días da vindeira semana para inaugurar a temporada vacacional xa esa primeira fin de semana.