Bye bye Moqur... A Brilat protagoniza un novo hito no repregamento de Afganistán
Por Redacción
De acordo co plan de repregamento do exército español de Afganistán previsto polo Ministerio de Defensa, as tropas da Brigada de Infantaría Lixeira (Brilat) deixaron este sábado a base 'Ricketts', situada na localidade de Moqur, na provincia de Badghis, repregándose á base situada na localidade de Qala-i- Naw á que chegaron, sen novidade, ás 9.41 hora española.
A saída produciuse 16 días despois da entrega da base de Ludina, e constitúe o segundo dos fitos do repregamento das tropas que España aínda mantén no país centroasiático. A partir de agora serán as unidades do Exército Nacional Afgán (ANA), adestradas polas tropas españolas, as que asuman plenamente a responsabilidade de garantir a seguridade na zona. Para iso contarán co seu asesoramento e apoio dende Qala-i-Naw.
A base foi transferida á empresa turco-americana EMJV, responsable das obras de construción da denominada 'Ring Road' na provincia de Badghis, que a utilizará como base loxística. O representante da empresa, Amid Scander, agradeceu a cesión da base, que servirá para acelerar o peche desta importante vía de comunicación, que percorre todo Afganistán.
Á finalización dos actos, o persoal español embarcou no último convoi de Moqur a Qala-i-Naw, precedido por un dos novos vehículos blindados 'Husky', que proporcionan mellores capacidades contra Artefactos Explosivos Improvisados (IED) aos convois de repregamento dende o pasado 6 de marzo.
O último soldado español en caer en Afganistán estaba destacado nesta base de Moqur. O sarxento David Fernández Ureña, pertencente á Unidade de Enxeñeiros da ASPFOR XXXII, faleceu o 11 de xaneiro de 2012 ao estoupar un IED cando realizaba labores de recoñecemento na ruta 'Opal', entre as localidades de Moqur e Darreh-i-Bum
Durante case tres anos en Moqur as tropas españolas traballaron para mellorar a seguridade e gobernabilidade na rexión así como para fomentar o desenvolvemento das súas poboacións. Entre outras moitas actividades de cooperación cívico militar, pódense destacar o programa de reintegración de insurxentes, a execución de obras civís como a derivación dun rio para mellorar o rego ou a reparación dos firmes das estradas e a distribución de material sanitario e humanitario na provincia.
Relacionadas:
-
Helicópteros 'Tigre' comezan a dar protección e seguridade á Brilat no repregamento de Afganistán
Por Redacción |
-
Os primeiros militares españois en Afganistán volverán a casa a próxima semana
Por Oskar Viéitez |
-
O xeneral da Brilat desprázase a Afganistán nun momento crave para o repregamento das tropas españolas
Por Natalia Puga |