O blogueiro pontevedrés Diego Santos aposta polo surf olímpico na Madrid Surf Film Festival
Por Redacción
O surf non só ten adeptos no litoral. Comprobouno o blogueiro pontevedrés Diego Santos, creador da páxina Mareas Vivas, un espazo na rede onde este sociólogo aplica os seus coñecementos sobre esta disciplina deportiva. Santos foi convidado a participar na primeira edición do Madrid Surf Filme Festival durante este fin de semana na capital española.
Nesta cita estreáronse 35 películas e desenvolvéronse diversas actividades deportivas e culturais relacionadas co surf cunha alta participación de afeccionados a este deporte acuático.
O pontevedrés expuxo un relatorio sobre aspectos do surf como a probable inclusión como deporte olímpico en Tokio 2020 e mostrou os seus coñecementos sobre a historia deste deporte, que cada vez conta con máis seguidores nas Rías Baixas.
Diego Santos defendeu recentemente a súa tese doutoral de Socioloxía na Universidad Rey Juan Carlos de Madrid, que se centra en analizar o mundo do surf e as implicacións que esta práctica ten para a sociedade e, sobre todo, para o movemento turístico.