O 2015 despídese cunha semana de precipitacións e ventos fortes
Por Redacción
Durante toda esta semana, o martes 29 será a xornada máis estable en canto ao tempo, á espera da entrada dunha nova fronte. Desta maneira, o día transcorrerá con ceos con alternancia de nubes e claros. A zona das Rías Baixas rexistrarán algunhas choivas débiles e ocasionais. As temperaturas sufrirán un descenso situándose entre os 10 e os 15 graos. Os ventos soprarán de compoñente sur, fortes en xeral, moi fortes no litoral e en zonas altas.
Ao longo do mércores, unha fronte afectará a toda Galicia, traendo un aumento de nubes e precipitacións, que comezarán pola mañá no litoral atlántico, segundo informa o servizo de Meteogalicia. As temperaturas experimentarán un moderado ascenso. Os ventos soprarán de compoñente sur, fortes e moi fortes no litoral e zonas altas e moderados, con intervalos fortes no resto.
Na última xornada do ano, o xoves 31, Galicia quedará nunha área de transición entre a fronte do día anterior e outra que afectará a toda a comunidade na xornada do día 1. Desta forma, os ceos atoparanse parcialmente nubrados e podería rexistrarse algunha choiva de tipo illado e ocasional con maior probabilidade durante a tarde. As temperaturas sufrirán un moderado descenso situándose entre os 10 e os 13 graos. Os ventos soprarán de suroeste, moderados no litoral.
A partir do novo ano, os ventos continuarán soprando de compoñente sur, con diferentes frontes que seguirán achegándose ás Rías Baixas, polo que a probabilidade de precipitacións seguirá sendo alta, especialmente na franxa atlántica. As temperaturas experimentarán un lento descenso.